Ljóstrað upp um svindl eftir asna á Extra­leikunum

Extraleikarnir hafa slegið í gegn í vetur en þeir eru ómissandi hluti af Körfuboltakvöldi Extra sem sýnt er á Sýn Sport Ísland á mánudagskvöldum.

Keppni kvöldsins má sjá í spilaranum hér að neðan en þar mættu menn venju samkvæmt kokhraustir til leiks og þóttust býsna sjóaðir í hinum sígilda leik asna.

Eftir keppnina var svo komið að því að Stefán Árni Pálsson, stjórnandi þáttarins, ljóstraði upp um ákveðinn skandal í frjálsíþróttahluta leikanna.

Eins og einhverjir muna sjálfsagt eftir þá vann Tommi 200 metra spretthlaupið gegn Andra fyrr í vetur. Stefán greindi frá því í kvöld að Tommi hefði þar fengið að byrja framar en hann hefði átt að gera, að áeggjan Silju Úlfarsdóttur sem dæmdi frjálsíþróttakeppnina.

Andri kvaðst reyndar hafa fengið upplýsingar um þetta óréttlæti frá frjálsíþróttadómurum og var ósáttur við að svindlað væri á sér. En Stefán benti þá á að Andri hefði fengið léttari kúlu en Tommi í kúluvarpinu, og ákvað því að þessi tíðindi hefðu engin áhrif á stigastöðuna á leikunum, eins og sjá má í spilaranum hér að ofan.