Skilur stress þjóðarinnar betur

Ómar Ingi sat heima vegna meiðsla þegar Ísland keppti á HM í Króatíu í janúar síðastliðnum. Það munaði um minna enda Ómar á meðal fremri handboltamanna heims og hefur raðað inn titlum með Magdeburg.

Hann hefur farið mikinn í haust og segist hafa verið með komandi stórmót á bakvið eyrað.

„Klárlega. Stórmót er alltaf dálítill hápunktur. Þú horfir svolítið á janúar, ert með hann í huga, að vera heill og í góðu standi. Svo viltu vera heill í lok tímabils þegar Final Four (úrslitahelgin í Meistaradeild Evrópu) er. Það eru þessir tveir hápunktar sem þú vilt toppa á. Þetta hefur klárlega verið á markmið,“ segir Ómar í Sportpakkanum á Sýn.

Nennir ekki að horfa aftur á stórmót

Ómar segist þá hafa fengið betri skilning á stressi landans yfir leikjum liðsins, þegar hann neyddist til að horfa á síðast mót.

„Það var náttúrulega ekkert gaman að horfa á þetta í fyrra,“ segir Ómar og hlær.

„Ég nenni því ekki neitt aftur. Ég er bara þakklátur fyrir að vera með, að vera heill, og hlakka til að spila,“ segir Ómar enn fremur og segist ekki hafa liðið neitt sérlega vel á sófanum yfir leikjum íslenska liðsins.

„Ég var mjög stressaður, miklu stressaðri en ef ég væri að spila. Ég skildi aðeins betur hvernig fólki líður heima sem er að horfa á þetta.“

Fólk má gera þær kröfur sem þær vill

Iðulega er markið sett hátt fyrir stórmótin í janúar. Logi Geirsson, fyrrum landsliðsmaður og sérfræðingur á RÚV segir stefnuna eiga að vera setta á undanúrslit og Kristján Örn Kristjánsson, sem datt út úr landsliðshópnum vegna meiðsla, segir íslenska liðið geta unnið til verðlauna.

En hvaða kröfur finnst Ómari að við eigum við að gera fyrir komandi mót?

„Ég veit það ekki alveg. Þú gerir bara þær kröfur sem þú vilt,“ segir Ómar léttur og bætir við:

„En við gerum þær kröfur að spila vel, við viljum byrja vel í fyrsta leik og ná góðum úrslitum. Þar liggur okkar einbeiting, að gera vel í riðlinum til að byrja með. Ég held það borgi sig ekki fyrir okkur að hugsa mikið lengra,“ segir Ómar.