Al­freð að­stoðaði Frey á Spáni

Norski miðillinn BA frá Bergen fylgist vel með öllu sem viðkemur Brann og þar náði naskur ljósmyndari myndum af Frey ásamt Eggerti Aroni Guðmundssyni og Sævari Atla Magnússyni, leikmönnum liðsins, á Marbella á Spáni.

Þeir horfðu þar á æfingaleik austurríska liðsins Sturm Graz við Club Brugge frá Belgíu. Sturm Graz er eitt tveggja liða sem Brann mætir í síðustu leikjum norska liðsins í deildarhluta Evrópudeildarinnar í þessum mánuði.

Brann mætir Midtjylland á heimavelli 22. janúar og sækir Styrm Graz heim viku síðar.

BA náði myndum af fyrrum félaga Freys, Alfreð Finnbogasyni, og virtist fara vel á með þeim félögunum. Alfreð var leikmaður karlalandsliðsins þegar Freyr var aðstoðarþjálfari Eriks Hamrén á sínum tíma. Alfreð var þá einnig leikmaður Lyngby í Danmörku undir stjórn Freys.

Alfreð og Freyr verða andstæðingar í Noregi á komandi ári en Alfreð tók í vikunni við sem íþróttastjóri Rosenborgar í Þrándheimi. Hann sat þó með Frey og aðstoðaði hann við njósnir um austurrískan mótherjann í vikunni.

Brann hafnaði í fjórða sæti norsku úrvalsdeildarinnar á nýliðinni leiktíð og fer í Sambandsdeildina að ári. Liðið var aðeins einu stigi frá bronsi.

Rosenborg hafnaði í sjöunda sæti deildarinnar, 14 stigum á eftir Brann.

Brann er þá í 22. sæti Evrópudeildarinnar með átta stig. Efstu átta lið deildarinnar fara í 16-liða úrslit en liðin 16 þar fyrir neðan, í 9.-24. sæti, fara í umspil um sæti í 16-liða úrslitum.