„Bara vá, ég er svo glaður“

„Þetta var stórt próf fyrir okkur sem lið og við stóðumst það og ég bara gæti ekki verið glaðari með niðurstöðuna,“ bætti Gísli við.

Hann tók þó undir það að íslenska liðið hafi þurft að hafa fyrir hlutunum.

„Enda er þetta helvíti gott lið þessir Ungverjar og þeir hafa reynst okkur mjög erfiðir í gegnum árin. Það vita það held ég bara flestir landsmenn að þeir henta okkur oft illa sem lið. Þetta var erfið fæðing í byrjun, en þegar við náum svona aðeins að leikgreina þá þá fannst mér við finna betri lausnir á þeirra vörn og við fengum betri færi. Auðvitað vorum við að klikka á helvíti mörgum dauðafærum sem hefði getað gert okkur auðveldara fyrir. Þeirra markmaður varði vel en við fengum líka góða bolta frá Viktori. En bara vá, ég er svo glaður.“

Á tímabili virtust dómarar leiksins ekki alveg vera með hlutina á hreinu og Gísli segir það einnig hafa verið að trufla leikmenn.

„Kannski aðeins of mikið, ég veit það ekki. Einhvernveginn þegar maður fær hendi í andlitið finnst manni að dómarinn eigi að sjá það, en þegar þeir dæma ekki neitt þá kannski var maður aðeins of fljótur upp. Við þurfum líka að passa okkur að verða ekki of tense, en mér fannst við finna fínt jafnvægi þegar við hættum að pæla í þessu og einbeittum okkur að því að spila handbolta.“

Að lokum segir hann að þessi sigur gefi liðinu mikið fyrir framhaldið.

„Að sjálfsögðu. Þetta var næsta skref fyrir okkur sem lið og ég er mjög spenntur fyrir framhaldinu og að takast á við þessa erfiðu mótherja sem bíða okkar í milliriðlinum.“