Körfuboltakvöld: Betra að temja villtan leik­mann en að vera með ein­hverja rolu

„Stundum hafa heyrst raddir úr Grindavík, sem segja að Khalil Shabazz sé ekki alveg málið“ sagði þáttastjórnandinn Stefán Árni Pálsson.

„Við erum búnir að heyra þetta bara nánast frá því að hann kom í Grindavík“ svaraði Benedikt Guðmundsson úr sérfræðingastólnum.

„Hann á sína haters, það er alveg klárt mál, en ef ég væri þjálfari Grindavíkur myndi ég ekki þora því að skipta honum út. Liðinu er búið að ganga vel með hann. Auðvitað hefur spilamennskan ekki alltaf verið sannfærandi en að fara á þennan markað og taka sénsinn…

…Segjum að þeir kasti teningunum og taki áhættuna, það eru alveg góðar líkur á því að þú fáir bara verri leikmann. Kannski með flottan prófíl en hann getur verið ekki í leikformi eða annað, það er alltaf áhætta að taka menn inn þegar svona langt er liðið á tímabilið“ bætti Benedikt við.

Sævar Sævarsson tók undir úr hinum sérfræðingastólnum og sagði ósniðugt að skipta Shabazz út.

„Hann er svolítið villtur en ég held að það sé miklu betra að vera með leikmann sem er smá villtur og temja það svo þegar þú kemur í úrslitakeppnina. Frekar en að vera með einhverju rolu sem þú nærð einhvern veginn aldrei að kveikja á.“

Umræðuna úr Körfuboltakvöldi má sjá í spilaranum að ofan.