Úlfurinn hans Al­freðs Gísla át skotin hjá Norð­mönnum

Þýska liðið er því með fullt hús á toppi síns milliriðils (6 stig) eftir sigurleiki á móti Spánverjum, Portúgal og svo Norðmönnum í kvöld. Frakkland og Danmörk eru með fjögur stig. Þýska liðið er nú í draumastöðu en síðustu tveir leikirnir eru á móti fyrrnefndum gríðarlega sterkum liðum Frakka og Dana.

Þýska liðið var tveimur mörkum undir í hálfleik en vann seinni hálfleikinn 15-11.

Alfreð Gíslason getur þakkað markverði sínum Andreas Wolff fyrir að sigurinn kom í höfn því úlfurinn í þýska markinu varði alls 22 skot í leiknum og mörg þeirra úr frábærum færum.

Marko Grgić var markahæstur í þýska liðinu með sjö mörk en þeir Johannes Golla og Lukas Zerbe skoruðu báðir fimm mörk. Sander Sagosen, August Pedersen og Kevin Gulliksen skoruðu allir fimm mörk fyrir Norðmenn.

Norðmenn höfðu byrjað milliriðilinn á sigri á Spáni en eftir þetta tap verður mjög erfitt fyrir þá að komast í undanúrslitin.

Norðmenn byrjuðu leikinn mjög vel og komust í 5-2 og 7-3 á upphafskafla leiksins. Frábær markvarsla Andreas Wolff kom þýska liðinu aftur inn í leikinn og Þjóðverjar voru búnir að jafna í 8-8.

Þýska liðið var um tíma einu marki yfir í fyrri hálfleiknum en Norðmenn skoruðu þrjú af síðustu fjórum mörkum hálfleiksins og voru því tveimur mörkum yfir í hálfleik, 17-15.

Andreas Wolff varði ellefu skot (39%) í fyrri hálfleiknum en samt var þýska liðið undir í hálfleik. Wolff hætti ekki að verja í seinni hálfleik og þá gekk mun betur hjá þýska liðinu hinum megin á vellinum.

Þjóðverjar komust fyrst yfir í 20-19 og stuttu síðar var staðan orðin 26-21 fyrir þá. Norðmenn minnkuðu muninn aftur í tvö mörk og hættu aldrei en í lokin munaði tveimur mörkum á liðunum.

Íslensku dómararnir Anton Gylfi Pálsson og Jónas Elíasson dæmdu leikinn og gerðu það vel.