Ótrú­leg saga Viggós rifjuð upp í er­lendum miðlum

Eins og íslensku handboltaáhugafólki er sjálfsagt kunnugt um þá hefði vel getað farið svo að Viggó hefði tekið fótboltann fram yfir handboltann. Óvíst er hvernig það hefði farið en hann hefði þá að minnsta kosti ekki skorað 11 mörk úr 11 skotum í einum fræknasta sigri Íslands á síðustu árum, gegn Svíum í gær.

TV 2 í Danmörku bendir á að Viggó hafi 19 ára gamall verið kominn í aðalliðið hjá Breiðabliki og verið í leikmannahópi liðsins í Evrópudeildinni, sumarið 2013.

Hann hafi svo snúið sér að handboltanum að nýju og einmitt byrjað atvinnumannsferilinn í Danmörku, með Randers, en þangað fór hann frá uppeldisfélagi sínu Gróttu árið 2016. Viggó spilaði svo fyrir West Wien í Austurríki áður en hann fór í þýsku deildina þar sem hann spilar í dag með Erlangen. „Þvílíkt ferðalag!“ skrifar TV 2.

Blaðamaðurinn Johan Flinck minnist einnig á þetta ferðalag Viggós í pistli sínum fyrir Sportbladet, útbreiddasta íþróttamiðil Svíþjóðar.

Þar bendir Flinck á þá áhugaverðu staðreynd að á meðan að Viggó var í takkaskónum á æfingum með Breiðabliki var til að mynda einn mótherja hans í gær, hornamaðurinn Hampus Wanne, kominn inn í liðið hjá Flensburg. 

Wanne vann svo Meistaradeild Evrópu í fyrsta sinn árið 2014, sama ár og Viggó ákvað að best væri að setja takkaskóna á hilluna og snúa sér alfarið að handbolta, íslenskri þjóð til heilla.