Gróf stríðs­öxina við fram­kvæmda­stjóra EHF

Dagur stýrði Króötum í undanúrslitum mótsins í gær þar sem hans menn töpuðu fyrir Þjóðverjum. Ísland tapaði síðar þann dag fyrir Dönum og mun Dagur því berjast við strákana okkar um bronsið.

Aðspurður hvernig hann hafi það á laugardagsmorgni eftir langan dag í gær segir Dagur:

„Þetta er bara eins og það er. Það er alltaf saman sagan. Þetta er vonbrigðaleikurinn en það er ennþá bronsmedalía til að berjast fyrir. Menn verða bara að taka því.“

Góður vinur framkvæmdastjórans

Blaðamannafundur Dags í aðdraganda leiks gærkvöldsins vakti heimsathygli. Hann sagði EHF litla sem enga virðingu bera fyrir leikmönnum og starfsfólki liðanna á EM og benti á skekkju í hvíldartíma liða fyrir undanúrslitin.

Eftir eldræðu hans á blaðamannafundinum gaf EHF það út að sambandið myndi breyta regluverki sínu og láta lið aldrei aftur spila tvo daga í röð, líkt og Króatar, Íslendingar og önnur lið í milliriðli 2 í Malmö þurftu að gera á dögunum.

Dagur segist fagna því og hann hafi þá hitt framkvæmdastjóra sambandsins, Martin Hausleitner, í gær og grafið stríðöxina. Hausleitner hafi þá verið meðvitaður um að Dagur myndi hafa hátt á téðum blaðamannafundi.

„Ég heyrði af því og finnst það bara flott. Ég þekki framkvæmdastjóra EHF mjög vel, við erum góðir vinir. Ég sagði bara við hann að ef hann ætlaði að bjóða mér á þennan blaðamannafund myndi ég segja mína meiningu. Svo hittumst við í gær, það var allt í góðu og áfram gakk,“

Gert fyrir þig, áttar þig á því

Fjölmiðlaviðburðurinn í Herning var snemma, klukkan tíu í morgun að staðartíma. Íslenska liðið mætti klukkan 10:30 eftir að Króatar höfðu komið á svæðið hálftíma fyrr.

HSÍ var ósátt við tímasetninguna sökum endurheimtar leikmanna sem þurftu að sinna sjúkranuddi langt fram á nótt. Aðeins níu leikmenn íslenska hópsins mættu í viðburðinn á meðan aðrir fengu að sofa út eftir langa nótt.

„Þetta er búið að vera svona í mörg ár. Dagar eins og þessir. Við erum að gera þetta fyrir þig. Þú áttar þig á því,“