Vonn tjáir sig eftir at­vikið óhugnan­lega: „Sé ekki eftir neinu“

Í færslu sem Vonn birti á samfélagsmiðlum núna í kvöld segir hún hægri handlegg sinn hafa festst innan í keppnishliði í braut á miklum hraða. 

„Í bruni getur munurinn á góðri keppnislínu og stórslysi verið jafn lítill og fimm tommur. Ég var einfaldlega fimm tommum of innarlega á keppnislínu minni þegar handleggurinn festist og ég snerist og féll.“ 

Við fallið í gær brotnaði Vonn illa á sköflungsbeini og þurfti að gangast undir tvær aðgerðir í gær.

„Brotið helst stöðugt núna en það mun þurfa fleiri aðgerðir til svo það geti orðið nógu gott aftur.“

Vonn sleit krossband í vinstra hné viku fyrir Vetrarólympíuleikana en ákvað samt sem áður að taka þátt á leikunum. Eftir að hún meiddist í gær hafa margir slegið því fram að meiðslum hennar hafi verið um að kenna, sökum þeirra hafi atvikið í gær átt sér stað. Vonn segir það af og frá 

Þrátt fyrir allt sér Vonn ekki eftir neinu.

 „Því að standa í rásmarkinu fylgdi ótrúleg tilfinning. Að vita að ég ætti möguleika á sigri var sigur út af fyrir sig,“ skrifar Vonn en hún átti þriðja besta tíma á æfingum á föstudaginn síðastliðnum, tveimur dögum fyrir aðalkeppnina.

Það sama gildi um skíðaíþróttina og lífið sjálft. Það þurfi að taka áhættur.