Hótar að koma í veg fyrir opnun brúar milli Windsor og Detroit

Til stendur að opna Gordie Howe International Bridge sem liggur á milli Detroit og Windsor í Ontario á næstu vikum eða mánuðum. Það liggur ekki fyrir hvernig Trump hyggst koma í veg fyrir að það gerist, þar sem Kanada greiddi fyrir framkvæmdina og á brúna með Michigan.

Trump gæti gripið inn í með því að lýsa yfir neyðarástandi en lögum samkvæmt er landamærayfirvöldum heimilt að loka aðgengi inn í landið þegar þjóðaröryggi er í húfi. Forsetinn hefur áður gripið til þess að lýsa yfir neyðarástandi til að ná fram markmiðum sínum.

Til viðbótar við að hafa í hótunum við stjórnvöld í Kanada, sem Trump hefur staðið í hálfgerðu stríði við frá því að hann tók aftur við embætti, gerði forsetinn því einnig skóna í gær að hann myndi mögulega freista þess að eignast helming í brúnni til að fá hluta af brúartollinum. 

Trump lofaði verkefnið í fyrri stjórnartíð sinni en það hefur andað köldu á milli Washington og Ottawa eftir að Trump hafði það í flimtingum að Kanada ætti að verða 51. ríki Bandaríkjanna og hóf tollastríð gegn hingað til traustum bandamanni og nágranna. Þá virðist það hafa farið verulega í taugarnar á honum lofið sem Mark Carney, forsætisráðherra Kanada, fékk fyrir ræðu sína í Davos, þar sem hann talaði um nýja skipan heimsmála. Ræða Trump þótti hins vegar ekki merkileg smíði, þar sem forsetinn óð úr einu í annað í langan tíma, eins og hann á til.

New York Times fjallar ítarlega um málið.