Bannað að hafa hjálm sem sýnir látin fórnar­lömb Rússa

Heraskevych hefur á æfingum sínum í Cortina, fyrir keppni á magasleða á Vetrarólympíuleikunum, verið með sérstakan hjálm með myndum af látnum fórnarlömbum innrásar Rússa.

IOC segir hjálminn hins vegar stangast á við reglur leikanna en hefur leyft Heraskevych að vera með svart armband til minningar um fórnarlömbin.

„Hjarta mitt er í molum“

Í samtali við Reuters segir sleðakappinn vera eyðilagður vegna ákvörðunarinnar. Á myndunum á hjálminum mátti sjá íþróttafólk á borð við lyftingastelpuna Alinu Peregudova, hnefaleikamanninn Pavlo Ishchenko og íshokkímanninn Oleksiy Loginov. Sumt af þessu fólki átti í vinasambandi við Heraskevych.

„Hjarta mitt er í molum yfir þessari ákvörðun. Þarna finnst mér IOC svíkja þetta íþróttafólk sem var hluti af Ólympíuhreyfingunni, með því að ekki megi minnast þess á íþróttvettvangi sem það mun aldrei fá að stíga inn á,“ sagði Heraskevych á Instagram. 

Hann fullyrti að IOC hefði í gegnum tíðina leyft sams konar leiðir til að minnast fólks en að nýjar reglur giltu varðandi Úkraínu.

Í reglum IOC segir að ekki megi sýna neinn „pólitískan, trúarlegan eða kynþáttatengdan áróður á Ólympíusvæðinu eða leikvöngum“.

Heraskevych segist ætla að virða ákvörðun IOC en vill um leið gera sitt besta til að vekja fólk til umhugsunar um að stríðið í Úkraínu geysar enn.

Mark Adams, talsmaður IOC, segir sambandið skilja ósk Heraskevych en að allt íþróttafólk eigi að fá að keppa á leikunum án þess að pólitísk skilaboð hafi þar áhrif.

„Við erum með yfir 90 þjóðir hér að keppa, þúsundir íþróttafólks, og það er fjöldi atriða sem fólk vill minnast. Við viljum að Ólympíuleikarnir séu öruggt svæði til að keppa, þó að fólki sé frjálst að tjá sig. Hann fær að vera með armband án texta. Þó að við viljum að fólk geti tjáð sig þá verðum við að finna réttu línuna,“ sagði Adams við BBC.