Hent út af ÓL vegna hjálmsins

Heraskevych hafði mætt á æfingar á leikunum með hjálminn og verið varaður við því að hann fengi ekki að keppa með hann.

Alþjóðaólympíunefndin, IOC, sagði hjálminn stangast á við reglur Ólympíuleikanna um að ekki mætti vera með neinn pólitískan áróður á keppnisstað.

Heraskevych hefur hins vegar setið við sinn keip og bent á að skautadansarinn Maxim Naumov hafi mátt halda á mynd af foreldrum sínum, sem létust í flugslysi, á meðan að beðið var eftir því að einkunn hans yrði birt.

Tárin láku niður kinnar Kirsty Coventry, forseta IOC, þegar hún ræddi við fjölmiðla eftir að ákvörðunin um að vísa Heraskevych úr keppni var tilkynnt. Í tilkynningu frá IOC sagði:

„Það var einlæg ósk IOC að herra Heraskevych tæki þátt. Þess vegna ræddi IOC við hann um að finna sem besta leið til þess að uppfylla ósk hans um að minnast íþróttafólks sem látist hefur eftir innrás Rússa í Úkraínu.“

Tillaga IOC var sú að Heraskevych myndi vera með svart armband, til að minnast hinna látnu, en við það vildi sleðakappinn ekki una. Því fór svo á endanum að IOC hefur nú bannað honum að keppa.

Hjálmurinn hans sýndi íþróttafólk og vini Heraskevych, þar á meðal lyftingastelpuna Alinu Peregudova, hnefaleikamanninn Pavlo Ishchenko og íshokkímanninn Oleksiy Loginov.