Ólympíugull og bón­orð á sömu Ólympíu­leikum

Johnson féll reyndar úr leik í risasviginu á Ólympíuleikunum í Mílanó og Cortina en eftir að hún kom í mark beið kærastinn Connor Watkins eftir henni.

Breezy Johnson hafði aðeins verið á marksvæðinu í nokkrar mínútur þegar kærastinn dró upp hring og fór á skeljarnar fyrir framan áhorfendur og aðra keppendur.

Margir urðu vitni að atburðinum í Ólympíukeppninni á fimmtudag.

Hún hafði unnið gullverðlaun í bruni fyrr á leikunum en vonbrigðin með risasvigið voru fljót að breytast í mikla gleði.

Johnson var ekki lengi að svara bónorðinu játandi. Í kjölfarið stillti hún sér upp fyrir myndatöku með trúlofunarhringinn.

Með hringnum fékk Johnson viðarstykki þar sem þessi texti var ritaður: „Honestly, who are we to fight the alchemy?“

Textinn er úr lagi Taylor Swift „The Alchemy“.

Þegar bandaríska sjónvarpsstöðin NBC spurði hana hvort hana hefði dreymt um að trúlofa sig á sömu Ólympíuleikum og hún vann gullverðlaun í bruni, sagði Johnson:

„Það var vonin mín! En það er algjörlega galið hvað allt gerist í einu og raunveruleikinn er svo ólíkur því sem maður ímyndaði sér, og svo miklu betri,“ sagði Breezy Johnson.