„Ekki besta liðið í kvöld en við vorum verri en þeir“

„Það fór allt úrskeiðis hjá okkur í kvöld og nálgunin hjá okkur sem liði var slæm. Við hefðum þurft að spila með meiri orku og betri taktík. Við byrjuðum leikinn ágætlega, en um leið og Þór komst yfir tóku þeir stjórn á leiknum,“ sagði Borce Ilievski, þjálfari ÍR, eftir  tap liðsins í kvöld.

„Við reyndum nokkrum sinnum að koma okkur aftur inn í leikinn, en það virtist alltaf eitthvað vanta upp á. Við náðum nokkrum sinnum að minnka muninn niður í tvö eða þrjú stig, en Þór náði alltaf að svara því og náðu þá aftur 5-7 stiga forskoti.“

ÍR hefði hæglega getað gert leikinn að alvöru spennuleik. Þeir náðu að minnka muninn niður í þrjú stig á lokamínútu leiksins en tókst ekki að nýta sér það.

„Í lokin hefði okkur vantað nokkrar mínútur til að vinna leikinn. Þór var ekki besta liðið í kvöld en við vorum einfaldlega verri en þeir. Þannig horfi ég á þennan leik.“