Magnus Carlsen enn einu sinni heims­meistari

Sigurinn kom eftir að Bandaríkjamaðurinn gerði mistök í þriðju af fjórum úrslitaskákum. Carlsen vann úrslitaleikinn 2,5-1,5.

Eftir á átti hann erfitt með að koma orðum að afrekinu. Ástæðan var að miklu leyti sú að hann var mjög þreyttur.

„Ég var svo þungur í hausnum í síðustu skákinni. Ég er bara alveg tómur í hausnum,“ sagði Carlsen við TV2.

Carlsen var bestur allan tímann á mótinu í Weissenhaus í Þýskalandi og gat að lokum fagnað titlinum með sigri á Caruana í úrslitum.

Alþjóðaskáksambandið (FIDE) skipulagði í fyrsta sinn opinbert heimsmeistaramót í frjálsri skák. Skáksambandið hefur áður haldið mót í Fischer-slembiskák.

Enn einn heimsmeistaratitillinn er því í höfn hjá hinum 35 ára gamla Norðmanni. Carlsen er fimmfaldur heimsmeistari í skák, ríkjandi sexfaldur heimsmeistari í atskák, ríkjandi níufaldur heimsmeistari í hraðskák og ríkjandi heimsmeistari í FIDE frjálsri skák.