Þórsarar fá nýtt í­þrótta­hús

Í drögum að samkomulaginu sem birt hafa verið á heimasíðu Akureyrarbæjar segir að Íþróttafélagið Þór búi við þá sérstöðu að tæplega helmingur iðkenda félagsins á aldrinum 5-19 ára geti ekki sótt æfingar á félagssvæði Þórs við Skarðshlíð. Þessir iðkendur æfi og keppi þess í stað í Íþróttahöllinni eða íþróttahúsum grunnskóla bæjarins.

Vegna þess og einnig vegna fyrirhugaðrar íbúðahverfis í Móahverfi og á þéttingarreitum á upptökusvæði Þórs er brýn þörf á nýju íþróttahúsi.

Gert er ráð fyrir íþróttasal með áhorfendabekkjum og aðstöðu eins og best verður á kosið fyrir leiki í efstu deild í meistaraflokki í körfubolta og handbolta, sem og mótahald yngri flokka. Einnig er gert ráð fyrir lyftingasal, æfingaaðstöðu auk forsals og afgreiðslu. Íþróttahúsið verður að framkvæmdum loknum eign Akureyrarbæjar en horft er til þess að verklegar framkvæmdir hefjist vorið 2028 og að íþróttamiðstöðin verði tilbúin til notkunar í ágúst 2031.

Bærinn hyggst veita 40 milljónir króna til verkefnisins á þessu ári, 50 á því næsta og svo 600 milljónir 2028 og 900 milljónir 2029.