Hildur lagði upp mark í stór­sigri Madrid CFF

Madrid CFF er að berjast í efri hluta deildarinnar um þessar mundir á meðan að Alhama CF er í harðri fallbaráttu. Hildur og hennar liðsfélagar áttu ekki í neinum vandræðum með að ná í sigur í dag. 

Ísinn var brotinn með fyrsta marki leiksins strax á áttundu mínútu og áður en fyrri hálfleikur hafði runnið sitt skeið var staðan orðin 3-0 Madrid CFF í vil. Hildur stóð sig vel á miðjunni og lagði upp annað mark liðsins. 

Tvö mörk til viðbótar í seinni hálfleik sáu til þess að Madrid CFF fór með 5-0 sigur af hólmi. Sigurinn lyftir liðinu upp í 7.sæti spænsku deildarinnar þar sem Madrid er nú með 30 stig en liðin í kring eiga öll eftir að spila sína leiki í 21.umferðinni.