Vann gull og frétti svo af and­láti ömmu sinnar: „Lofaði henni að ég yrði hug­rökk“

Eileen Gu varði í dag Ólympíutitil sinn í skíðafimi, hálfpípu. Þetta voru þriðju gullverðlaun hennar á Vetrarólympíuleikum en hún vann tvenn á leikunum í Peking fyrir fjórum árum.

Eftir að hafa tryggt sér gullverðlaunin í dag fékk Gu þau válegu tíðindi að amma hennar hefði látist.

„Hún hafði svo mikil áhrif á mig. Í síðasta sinn sem ég sá hana, fyrir leikana, var hún mjög veik svo ég vissi að þetta væri möguleiki,“ sagði Gu.

„Sennilega sagði ég ekki að ég myndi vinna en ég lofaði henni að ég yrði hugrökk eins og hún hefur verið.“

Gu, sem keppir fyrir hönd heimalands móður sinnar, Kína, hefur alls unnið til sex verðlauna í skíðafimi á Vetrarólympíuleikum. Enginn keppandi í sögu greinarinnar á Vetrarólympíuleikunum hefur unnið til fleiri verðlauna en hin 22 ára Gu.