Stálu krullusteinum á Ólympíu­móti fatlaðra

Atvikið átti sér stað nokkrum vikum eftir að krulla komst í fréttirnar á Ólympíuleikunum þegar karlalið Kanada var sakað um svindl á leið sinni að Ólympíugullinu.

Hjólastólakrulla á Ólympíumóti fatlaðra hófst á miðvikudagskvöld og segja mótshaldarar að þeir séu að rannsaka hvert granítsteinarnir hafi farið.

„Við höfum tekið í notkun varasteinana og þeir eru hluti af upprunalega settinu. Þetta mun ekki hafa nein áhrif á keppnina,“ segir í yfirlýsingu frá Alþjóðakrullusambandinu.

Steinarnir eru taldir vera um 750 punda virði hver og einn eða um 125 þúsund íslenskar krónur.

Krulla á það til að fara undir radarinn hjá stóru fjölmiðlunum bæði á Ólympíuleikunum og Ólympíumóti fatlaðra, en þjófnaðurinn á steinunum hefur haft öfug áhrif, líkt og þegar Kanada var sakað um svindl.

Deilur brutust út eftir að karlalandslið Svía sakaði kanadíska krulluspilara um að snerta steinana tvisvar í leik liðanna.

Til að bregðast við þessu tilkynnti Alþjóðakrullusambandið upphaflega að tveir dómarar myndu fylgjast með línunni, þeim stað þar sem krulluspilarar verða að sleppa steininum, það sem eftir væri af keppninni.

Ástandið magnaðist hins vegar fyrir kvennalandslið Kanada þegar einn af steinum þeirra var tekinn úr leik fyrir tvísnertingu í tapi gegn Sviss. Í samtali við fjölmiðla hafnaði kanadíski krulluspilarinn Rachel Homan ásökununum alfarið.

„Mér finnst orðið svindl koma upp úr þurru. Þetta hefur ekkert með svindl að gera. Það er enginn möguleiki á að Kanadamenn myndu nokkurn tíma svindla af ásettu ráði,“ sagði hún.

„Við gerum það ekki. Við erum að keppa þarna úti. Við erum harðar af okkur. Þú veist, hlutir gerast. Fólk brennir steina. Fólk fer yfir línuna, það er bara hluti af íþróttinni.“

Karlalandslið Kanada vann svo gull á leikunum eftir sigur á liði Bretlands í úrslitaleiknum.

Setningarhátíð Ólympíumóts fatlaðra í ár verður í Veróna á föstudagskvöld.