„Held þetta hafi verið allt sem við viljum úr þessum slag“

„Þetta var hörku leikur, tvö mjög góð lið og virkilega skemmtilegt að tækla þennan leik í dag. Held þetta hafi verið allt sem við viljum úr þessum slag,“ sagði Kári Jónsson, eftir sigur Vals á KR í kvöld.

„Frammistaðan var fín, við vorum þéttir varnarlega mestmegnis, Key og Callum voru svo að setja helvíti mörg skot framan af leik til að halda okkur í þessu.“

Það gerðist oftar en einu sinni að Kári reyndi við stigin þrjú en boltinn vildi bara ekki ofan í.

„Ég var orðin alveg þreyttur á þessu, mér fannst boltinn alltaf vera að skríða allan hringinn og uppúr. Þetta var vel pirrandi en síðasta karfan fór að minnsta kosti ofan í og sú karfa skipti svona mestu máli.“