Húrra dregur saman seglin

Greint er frá þessu í tilkynningu á samfélagsmiðlum Húrra Reykjavíkur undir yfirskriftinni: „Sagan heldur áfram á Hverfisgötu.“

„Við höfum ákveðið að loka verslunum Húrra í Kringlunni og Smáralind til þess að einbeita okkur að heimavellinum á Hverfisgötu,“ segir í tilkynningunni.

Í tilkynningunni segir að smásala hafi tekið miklum breytingum frá því Húrra var opnuð árið 2014. Rekstur sjálfstæðrar íslenskrar verslunar hafi aldrei verið auðveldur en alltaf þess virði.

„Nú er komið að því að einfalda hlutina og fara aftur að rótunum. Húrra byrjaði sem hugmynd tveggja vina sem vildu bjóða upp á þann fatnað og skó sem þeim fannst vanta. Verslunin á Hverfisgötu verður áfram hjartað í Húrra og áherslan áfram á fallegar vörur í afslöppuðu umhverfi með persónulegri þjónustu,“ segir í tilkynningunni.

Þá þakka þeir öllum þeim sem hafa stutt verslunina í gegnum árin, keypt sér flík og drukkið vínglas og öllu starfsfólkinu sem hefur unnið hjá þeim síðustu ellefu ár.

„Þetta er ekki endirinn. Við erum að draga saman seglin og undirbúa Húrra fyrir næsta kafla. Við byrjuðum hér, og hér höldum við áfram. Sjáumst á Hverfisgötu,“ segir að lokum í tilkynningunni.