Hjör­var ó­sam­mála goð­sögn í hita­máli dagsins

Tottenham tapaði í gær 5-2 á útivelli gegn Atletico Madrid í fyrri leik liðanna í sextán liða úrslitum Meistaradeildar Evrópu. Igor Tudor, knattspyrnustjóri Tottenham, ákvað að tefla fram varamarkverði liðsins Antonin Kinsky í rammanum þar sem að aðalmarkmaður liðsins, Vicario, hafði ekki verið að standa sig vel fram að leik gærkvöldsins.

Skemmst er frá því að segja að Kinsky átti afleitan leik og gaf Atletico Madrid tvö mörk á silfurfati. Leikar stöðu 3-0 Madrídingum í vil þegar að fimmtán mínútur höfðu liðið af leiknum, þá fékk Tudor nóg og tók Kinsky af velli.

„Ég fullyrði það að þetta kostar Igor Tudor starfið. Ég skal líka fullyrða að það er ekki nokkurt einasta félag á einhverju háu gæðastigi sem er að fara ráða Igor Tudor. Að gera drengnum þetta. Þetta er bara ljótt,“ sagði Rikki G, sem lýsti leiknum, á þeim tímapunkti en í kjölfarið hefur átt sér stað mikil umræða og sett fram gagnrýni á störf Tudor.

Hárrétt að skipta honum út af

Fyrrverandi atvinnu- og landsliðsmennirnir Peter Schmeichel og Joe Hart eru meðal þeirra sem hafa gagnrýnt Tudor. Schmeichel sagði Tudor hafa rústað ferli Kinsky.

„Ég er búinn að fylgjast vel með umræðunni. Búinn að sjá það sem Joe Hart og Peter Schmeichel höfðu að segja um þetta. Ég er ósammála þeim. Ég held að það sé hárrétt að taka Kinsky út í þessari stöðu,֧ segir Hjörvar Hafliðason, Dr. Football, í samtali við íþróttadeild.

„Hann gerir tvö skelfileg mistök. Eiginlega verri mistökin koma í seinna markinu þar sem að hann reynir sendingu sem er alveg ofboðslega erfið í því rugli sem Tottenham liðið var í á þeim tíma. Ég held það hafi verið hárrétt ákvörðun hjá Igor Tudor að taka hann af velli. Hvernig hefði staðan verið hefði hann haldið honum inn á?

Það má alveg taka markmenn af velli. Ég held að ástæðan fyrir því að fólki er svona brugðið sé sú að þetta gerist svo sjaldan. Hérna í gamla daga var einn skiptimaður eða tveir skiptimenn. Maður menn voru ekkert að “eyða“ skiptingu í markmann. Ég held það hafi verið hárrétt ákvörðun að taka hann af velli því ég held þetta hefði orðið verra hefði hann haldið áfram inn á.“

Tudor hafi tekið sénsinn með því að stilla  og það hafi ekki gengið upp.

„Hann tekur sénsinn að skipta um markmann því Vicario hefur ekki verið frábær. Hann síðan áttar sig á því að þetta er engan veginn að ganga. Tudor er bara búinn hjá Tottenham. Ætlarðu hins vegar að skipta um þjálfara núna? Láta nýja manninn fá Liverpool á sunnudaginn og Atletico Madrid í kjölfarið? Byrja væntanlega á tveimur töpum ef við erum algjörlega raunsæir. Þetta er rosalega erfið staða.“

Nánar verður rætt við Hjörvar um málið og stöðu Tottenham, sem er í harðri fallbaráttu í ensku úrvalsdeildinni, í Sportpakkanum á Sýn í kvöld.