Chelsea hlaut bann og þunga sekt eftir ólög­legar leyni­greiðslur

Um er að ræða brot sem áttu sér stað á árunum 2011-2018, þegar Chelsea var í eigu rússneska auðkýfingsins Romans Abramovich sem svo seldi félagið árið 2022 til félags sem Bandaríkjamaðurinn Todd Boehly leiðir.

Chelsea hefur,, samkvæmt BBC, viðurkennt að 47 milljónum punda hafi verið varið í leynilegar greiðslur til umboðsmanna og annarra aðila. 

Samkvæmt skýrslu ensku úrvalsdeildarinnar er um að ræða greiðslur vegna kaupa á stórstjörnum á borð við Eden Hazard, Samuel Eto‘o, Willian, Ramires, David Luiz, Andre Schurrle og Nemanja Matic.

Sektin sem félagið hefur nú hlotið er upp á 10 milljónir punda eða næstum 1,7 milljarð króna.

Félagið þarf einnig að greiða 750.000 punda sekt vegna skráningar leikmanna í unglingaakademíunni á árunum 2019-2022, og er akademían komin í níu mánaða félagaskiptabann sem er ekki skilorðsbundið og tekur strax gildi.

Þar sem að félagaskiptabannið fyrir aðallið Chelsea er skilorðsbundið, til tveggja ára, ætti það ekki að koma í veg fyrir leikmannakaup hjá félaginu nema að eitthvað fleira komi upp á.