Sport

Júlía og Christina fara á sitt fyrsta HM

Sindri Sverrisson skrifar
Júlía Kristín Jóhannesdóttir og Christina Alba Hafliðadóttir eru á leiðinni á HM og keppa þar um helgina.
Júlía Kristín Jóhannesdóttir og Christina Alba Hafliðadóttir eru á leiðinni á HM og keppa þar um helgina. Samsett/@ricewtfxc/FRÍ

Ísland sendir þrjá keppendur á HM innanhúss í frjálsum íþróttum í Póllandi um helgina, allt konur, og munu tvær þeirra keppa í fyrsta sinn á heimsmeistaramóti fullorðinna.

Frá þessu var greint á vef RÚV í dag.

Aníta Hinriksdóttir er reynsluboltinn í hópnum enda Ólympíufari og bronsverðlaunahafi í 800 metra hlaupi á EM innanhúss 2017. Aníta á meðal annars Íslandsmetin í 800 og 1.500 metra hlaupi innanhúss og er með keppnisrétt í 1.500 metra hlaupi.

Hinar tvær hafa svo verið á mikilli siglingu í vetur en það eru þær Júlía Kristín Jóhannesdóttir og Christina Alba Marcus Hafliðadóttir.

Júlía hefur á skömmum tíma í vetur þríbætt þrjátíu ára Íslandsmet Guðrúnar Arnardóttur í 60 metra grindahlaupi, sem verður hennar grein á HM.

Christina varð svo í vetur, þrátt fyrir að vera aðeins 18 ára, næstfljótust íslenskra kvenna í sögunni, með því að hlaupa 60 metra á 7,44 sekúndum og verður það hennar grein á HM.

Aníta keppir fyrst þríeykisins, á föstudaginn, en Christina Alba á laugardaginn og Júlía Kristín á sunnudaginn.

Mest lesið


Fleiri fréttir

Sjá meira


×

Mest lesið