„Nú hafi orðið bak­slag“

Í skrifum sínum viðurkennir Kristrún að stjórnvöld hafi verið vongóð eftir lægstu verðbólgumælingu í fimm ár síðasta haust og lækkun stýrivaxta, en að þau hafi mögulega fagnað of snemma.

„Þróunin hefur verið í rétta átt. Það er staðreynd – þó að nú hafi orðið bakslag,“ segir Kristrún sem bætir við að ríkisstjórnin taki ábyrgð á stöðunni og muni herða sig enn frekar.

Forsætisráðherra segir hækkanirnar sem nú blasi við vera á breiðum grunni og að því þurfi allir armar hagstjórnarinnar að vinna saman. Hún bendir á að kjarasamningar séu í gildi sem setji launaþróun skorður og að ríkisstjórnin muni leggja sitt af mörkum í fjármálaáætlun og með því sem hún kallar fyrstu hallalausu fjárlögin í nærri áratug.

Þá segir hún stjórnvöld jafnframt vera að klára Airbnb-málið á Alþingi og önnur úrræði sem eigi að draga úr þenslu á húsnæðismarkaði. Einnig sé unnið að fyrstu atvinnustefnu Íslands sem verði kynnt á næstu vikum.

Kristrún segir jafnframt að fyrirtæki beri ábyrgð á stöðunni og verði að halda aftur af álagningu til að styðja við efnahagslegan stöðugleika.

Að hennar sögn er ekki í boði að missa sjónar á verkefninu. Hún segist trúa því að takast megi að vinda ofan af bakslaginu og skapa betra jafnvægi í íslensku efnahagslífi til lengri tíma.