„Við gerðum þetta reyndar í fyrra líka“

Haukar tryggðu sér deildarmeistaratitilinn með 82-67 sigri gegn KR í úrslitaleik í lokaumferðinni. Haukarnir byrjuðu leikinn illa en spýttu síðan vel í lófana.

„Þetta kom svolítið í seinni hálfleik. Þær voru allar að bíða eftir að næsta myndi stíga upp. En um leið og við settumst aðeins niður, settum okkar saman og allar stigu upp, þá sýndu við hversu góðar við getum verið… Þetta var svolítið einhæft en um leið og við fórum að láta boltann aðeins ganga á milli þá opnuðust aðrar. Mér fannst allar stíga vel upp í seinni hálfleik.“

Haukarnir þekkja það af eigin skinni, frá því í fyrra, hversu mikilvægur heimavallarrétturinn er í úrslitakeppninni. Sagan gæti endurtekið sig því Njarðvík endaði aftur í öðru sæti.

„Þetta gefur gríðarlega mikið, eins og sýndi sig í fyrra. Þá var oddaleikur og pakkað hús, ég held að það sé það sem vann Íslandsmeistaratitilinn fyrir okkur í fyrra. Það er gott að vita að við eigum alla oddaleiki hér ef við förum í það í úrslitakeppninni.“

Haukar mæta inn í þessa úrslitakeppni með 10 sigra í síðustu 11 leikjum. Segja má að þær séu sjóðheitar þessa dagana en Emil vonar að þær snöggkólni ekki eins og í fyrra.

„Við gerðum þetta reyndar í fyrra líka, komum inn með einhverja tíu sigra en töpuðum síðan fyrstu tveimur leikjunum í úrslitakeppninni. Við verðum að byrja þetta af krafti frá fyrsta leik. Öll lið stíga upp í úrslitakeppninni. Þannig að ef við ætlum bara að vera á sama stað þá verður þetta erfitt,“ sagði Emil en Haukar mæta Stjörnunni í átta liða úrslitum.