Selur húsið sitt til að komast á HM í fót­bolta

Hátt miðaverð, rándýr ferðakostnaður sem er alltaf að hækka og svo má ekki gleyma fæði og uppihaldi en Bandaríkjamenn ætla svo sannarlega að græða pening á gestum mótsins.

Englendingurinn Andy Milne hefur því ákveðið að selja húsið sitt til að fjármagna HM-ferðina í sumar.

„Þetta mun kosta heilmikla peninga,“ sagði hinn 62 ára gamli Milne við Mirror.

Sumir kannast kannski við andlit hans frá fyrri mótum. Milne er nefnilega að fara á sitt tíunda heimsmeistaramót í fótbolta. Hann hefur farið á níu karlamót og eitt kvennamót.

Oft sést hann halda á eftirlíkingu af sigurverðlaununum, sjálfum heimsbikarnum. Til að geta bætt enn einu heimsmeistaramótinu við í sumar hefur Milne nú sett sitt annað hús, sem er á Norður-Englandi, á sölu fyrir 58 milljónir íslenskra króna.

„Síðasta mót í Katar (2022) var gjöf til mín sjálfs. Ég hafði sparað í mörg ár fyrir það. Við höfum átt annað heimili í 27 ár, svo það virtist vera rétti tíminn til að fá pening fyrir það,“ sagði Milne en hann er kennari á eftirlaunum.

Þrátt fyrir að Milne reyni að ferðast ódýrt er hann viss um að það verði dýrt.

Ferðin felur nefnilega ekki bara í sér einn, tvo eða þrjá leiki. Hann ætlar að vera á staðnum í sjö vikur og er með miða alla leið í úrslitaleikinn.

Húsið sem nú er til sölu hefur Milne leigt út í langtímaleigu. Hann býr nú í Taílandi en fylgist þó enn náið með enska fótboltalandsliðinu. Þegar hann er á landsleikjum verður mikið um myndatökur með öðrum stuðningsmönnum.

„Ég er þekktur alls staðar, jafnvel af skoskum stuðningsmönnum. Skotarnir bjóða mér alltaf í drykk. Einn bauð mér í Piña colada og annar bauð mér í romm og lime,“ sagði Milne.

England mætir Króatíu, Gana og Panama í úrslitakeppninni. HM fer fram í Bandaríkjunum, Kanada og Mexíkó.

Opnunarleikurinn verður spilaður 11. júní og er hann á milli Mexíkó og Suður-Afríku.