Stór­bætti Ís­lands­metið í hundrað kíló­metra hlaupi

Arnar var langfyrstur til að klára 100 kílómetra hlaupið, rúmlega klukkutíma á undan næsta keppanda.

Aðstæður í Slóveníu í dag voru alls ekki eins og þær gerast bestar, sólin skeint skært og mótvindurinn var mikill en Arnar náði markmiðinu um að slá Íslandsmetið. Hann sagði frá hlaupinu í færslu á Instagram.

„Þetta gekk í raun ógeðslega vel, ég var ekki með vott um krampa og öll næring gekk vel en það var heiðskírt og sól allan tímann. Brjálaður vindur líka og það telur, það var ógeðslega erfitt.

Því miður er hringurinn líka þannig að 350 metrar voru í meðvindi en hinir 650 metrarnir í mótvindi. Þannig að það var vel erfitt seinni hlutann, þegar vindurinn varð meiri og meiri. Þeir segja mér að hálf Slóvenía sé ekki með rafmagn út af þessum vindi.

En ég myndi segja að undirbúningurinn og hlaupið í heild sinni hafi verið frábært. Ég er ógeðslega ánægður með að slá Íslandsmetið og gæti ekki verið sáttari… Djöfull er ég til í að hvíla mig svolítið núna,“ sagði Arnar.

Fyrra Íslandsmet Arnars var frá því í Rauðavatnshlaupinu síðasta haust en þar hljóp hann 100 kílómetra á 6:45:16.