Fjögur mörk í þremur lands­leikjum með fyrirliðabandið

Orri hefur reyndar misst af mörgum leikjum vegna meiðsla en var mættur aftur með stæl í gær þegar íslenska liðið gerði 2-2 jafntefli við HM-gestgjafa Kanada.

Orri skoraði tvö mörk á fyrstu 22 mínútunum, bæði með hásklassa framherjaafgreiðslum. Hann er enn 21 árs gamall en er þegar kominn með níu mörk í fyrstu sautján landsleikjum sínum.

Orri skoraði einnig í tveimur fyrstu landsleikjum sínum eftir að Arnar setti á hann fyrirliðabandið. Hann hefur því skorað fjögur mörk í þremur landsleikjum með fyrirliðabandið.

Orri skoraði í báðum leikjunum við Kosovo í mars í fyrra. Hann jafnaði metin í 1-1 í 2-1 tapi í fyrri leiknum og kom íslenska liðinu síðan í 1-0 í 3-1 tapi í seinni leiknum en báðir voru þeir leikir í umspili Þjóðadeildarinnar.

Orri er að byrja alla þessa leiki mjög vel en öll mörkin fjögur hafa komið á fyrstu 22 mínútum leikjanna. Hann skoraði á 2. mínútu í öðrum Kósóvóleiknum og á 22. mínútu í hinum.

Mörkin á móti Kanada komu síðan bæði í upphafi leiks eða á 9. og 22. mínútu. Það er eins gott fyrir mótherja íslenska landsliðsins að missa ekki augun af Orra á fyrstu 25 mínútum leikjanna.

Orri spilaði í 67 mínútur í leiknum á móti Kanada og í 90 og 65 mínútum í leikjunum á móti Kosovo. Þessi fjögur mörk hafa því komið á bara 222 mínútum sem þýðir að mark á 55,5 mínútna fresti.

Orri skoraði þrjú mörk í fyrstu ellefu landsleikjum sínum en hefur síðan skorað sex mörk í síðustu sex. Eini leikurinn sem hann hefur ekki komist á blað í þessum síðustu sex var þegar hann fór meiddur af velli eftir aðeins 25 mínútur á móti Wales.