Grind­víkingar harma og for­dæma hegðunina

Líkt og greint var frá í gærkvöld sauð hressilega upp úr undir lok leiks Grindavíkur við Njarðvík í fyrsta leik liðanna í 8-liða úrslitum úrslitakeppninnar í Bónus deild karla.

Stimpingar milli leikmanna undu upp á sig þar sem gæslumenn og lögreglufólk þurfti að blanda sér í leikinn eftir að stuðningsmenn fóru inn á völlinn til að taka þátt í átökunum.

Málið er nú á borði aganefndar KKÍ sem mun taka málið fyrir í dag og á morgun og niðurstöðu að vænta hvað leikbönn og sektir varðar á laugardaginn.

Körfuknattleiksdeild Grindavíkur sendi frá sér yfirlýsingu um hádegisbilið vegna atviksins þar sem hegðun stuðningsmanna er hörmuð og fordæmd. Viðkomandi hafi beðist afsökunar sinni hegðun.

Deildin muni enn fremur endurskoða verklag í kringum leiki í Grindavík vegna atviksins.

Yfirlýsinguna má sjá í heild að neðan.

Njarðvík vann óvæntan tíu stiga sigur í leiknum í gær, 97-87, gegn deildarmeisturum Grindavíkur sem hafa ekki tapað leik í Grindavík í allan vetur.

Njarðvík leiðir einvígi liðanna því 1-0 fyrir annan leik liðanna sem fram fer í IceMar-höllinni í Reykjanesbæ á mánudagskvöld.

Yfirlýsing körfuknattleiksdeildar Grindavíkur:

Körfuknattleiksdeild UMFG harmar einlæglega þau atvik sem áttu sér stað undir lok leiksins og biðst afsökunar við körfuknattleiksdeild Njarðvíkur, leikmenn, þjálfara, starfsfólk, dómara, KKÍ, stuðningsfólk og alla körfuknattleiksfjölskylduna.

Við fordæmum þá hegðun sem þarna átti sér stað. Það er óásættanlegt þegar stuðningsmaður gengur að leikvellinum með þeim hætti sem gerðist. Viðkomandi hefur beðist afsökunar á framferði sínu.

Sem mótshaldari munum við fara yfir málið af fullri alvöru, endurmeta verklag og öryggisfyrirkomulag og grípa til nauðsynlegra úrbóta.

Við viljum jafnframt þakka dómurum, gæslu og lögreglu fyrir skjót og ákveðin viðbrögð þegar á reyndi.

Körfuknattleiksdeild UMFG stendur fyrir ástríðu, baráttu og sterkt körfuboltasamfélag, en líka virðingu og góða umgjörð. Atvikin undir lok leiksins voru ekki í anda þeirra gilda sem félagið stendur fyrir og verður brugðist við af ábyrgð og festu.