Fékk fyrirliðabandið og bauð upp á furðu­lega fimmu

Diarra er fyrirliði gamla Íslendingaliðsins Haugesund sem féll úr deildinni síðasta haust eftir sextán tímabil í úrvalsdeildinni.

Þetta er liðið sem Óskar Hrafn Þorvaldsson þjálfaði í stuttan tíma árið 2024 en bæði hann og íslenskir leikmenn þess hafa yfirgefið það síðan.

Nú var komið að fyrsta leik liðsins í B-deildinni í mjög langan tíma og liðið vann þá 4-2 útisigur á Lyn í Osló.

Frammistaða þessa 26 ára Malímanns stal þó öllum fyrirsögnum með sínum fimm mörkum. Diarra skoraði nefnilega fjögur mörk í rétt mark og eitt í rangt mark. Þetta var einmitt fyrsti leikur hans með fyrirliðabandið.

Diarra kom hann Haugesund yfir eftir átta mínútna leik, áður en hann skoraði í rangt mark sautján mínútum síðar. Því næst sá hann um að skora mörkin sem komu liðinu í 2-1, 3-2 og 4-2. Í millitíðinni hafði Andreas Hellum minnkað muninn í 2-2 fyrir Lyn.

Diarra hefur verið hjá Haugesund frá árinu 2023 en hafði mest skorað níu mörk á einu tímabili í öllum keppnum og skoraði samanlagt sjö mörk í 22 leikjum í fyrrasumar.

Vefsíða Haugesund lék sér með atburði dagsins með því að slá upp fyrirsögninni „Sory, not Sory“.