„Ég stöðvaði þessar sam­farir“

Hildur rifjaði þetta upp í nýjasta þætti skemmtiþáttarins Af vængjum fram, þangað sem frambjóðendur til borgarstjórnarkosninga mæta og gæða sér á eldsterkum kjúklingavængjum milli þess sem þeir svara krefjandi spurningum á léttari nótum. Þangað mætti hún ásamt Björg Magnúsdóttur oddvita Viðreisnar.

Gekk beint til verks

Í þættinum voru frambjóðendurnir þær Hildur og Björg beðnar um að rifja upp vandræðaleg augnablik í vinnunni. Hildur vann eitt sumar á Hrafnistu þegar hún var í menntaskóla.

„Og eitt skiptið þegar ég var á vakt var ég send í mjög sérstakt verkefni. Þá voru kona og maður á Hrafnistu sem höfðu fellt hugi saman, nema hvað að konan var nýkomin úr mjaðmaskiptum og það spurðist til þeirra í miklu fjöri inni í svefnherbergi, sem er bara yndislegt, nema að ég var send til að stöðva þau, af því hún mátti ekkert vera í svona fjöri nýkomin úr mjaðmaskiptum.“

Hildur segist enn þann dag í dag ekki vita hvort kollegar hennar hafi einfaldlega verið að stríða henni.

„En ég bara tók þetta verkefni og ég kláraði það. Ég stöðvaði þessar samfarir.“

Var það bara bank á hurðina?

„Já. Heyrðu vina, þú ert nýkomin úr mjaðmaskiptum. Þetta verður að bíða.“

Alla þætti í þessari seríu Af vængjum fram má horfa á á myndbandsvef Vísis og á Sýn+. Þættirnir eru sýndir í línulegri dagskrá á Sýn á sunnudagskvöldum klukkan 18:55.