Espanyol getur gert Barcelona að meisturum á morgun

Barcelona þurfti að bíða lengi eftir marki en það skilaði sér loks á 81. mínútu. Robert Lewandowski kom boltanum í netið og þá brast stíflan, Ferran Torres skoraði annað mark fyrir Barcelona aðeins fimm mínútum síðar.

Það kom því ekki að sök þegar Raul Garcia skoraði fyrir Osasuna á 88. mínútu. Barcelona vann 1-2 sigur eftir mjög svo fjörugar lokamínútur.

Fyrir tilviljun mætast svo helstu erkifjendur Barcelona á morgun, Espanyol og Real Madrid.

Ef sá leikur endar með jafntefli eða sigri heimaliðsins Espanyol verður Barcelona spænskur meistari. Real Madrid þarf að vinna leikinn til að halda lífi í draumnum um spænska meistaratitil, eða framlengja þjáningar sínar örlítið lengur.

Í næstu umferð mætast svo Barcelona og Real Madrid. Þannig að ef Real Madrid misstígur sig á morgun mun liðið þurfa að standa heiðursvörð um Börsunga á Nývangi næsta sunnudag.