Fékk svaka­legan skurð gegn Chelsea og stjórinn vonast eftir krafta­verki

Eftir um klukkutíma í leiknum á Stamford Bridge í gær lentu þeir Gibbs-White og Sánchez í samstuði og þurftu báðir að yfirgefa völlinn. Gibbs-White byrjaði á bekknum í gær en kom inn á sem varamaður í hálfleik og lagði þriðja mark Forest upp fyrir Taiwo Awoniyi.

Í gærkvöldi birti Gibbs-White mynd af sér á Instagram og þar sást greinilega hversu illa hann var farinn eftir samstuðið við Sánchez. Nokkur spor voru saumuð í enni og nef Gibbs-White.

Forest mætir Aston Villa í seinni leik liðanna í undanúrslitum Evrópudeildarinnar á fimmtudaginn. Vítor Pereira, knattspyrnustjóri Forest, vonast til að geta teflt Gibbs-White fram í þessum mikilvæga leik á Villa Park.

„Hann fékk djúpan skurð en við sjáum hvað setur. Hann er baráttumaður og við vonumst eftir kraftaverki. Ég trúi því að hann verði með í næsta leik. Ég sagði við hann: Ekki skalla boltann, bara spila,“ sagði Pereira eftir leikinn gegn Chelsea.

Forest vann fyrri leikinn gegn Villa á City Ground með einu marki gegn engu. Liðið stendur því vel að vígi fyrir seinni leikinn eftir tvo daga og á góða möguleika á að komast í sinn fyrsta úrslitaleik í Evrópukeppni í 46 ár.

Eftir sigurinn í gær er Forest sex stigum frá fallsæti þegar þremur umferðum er ólokið í ensku úrvalsdeildinni. Forest er taplaust í síðustu tíu leikjum sínum í öllum keppnum og hefur aðeins tapað fjórum af sextán leikjum sínum eftir að Pereira tók við því um miðjan febrúar.