Oddvitaáskorunin: Mis­tök að kenna hundinum á klukku

Sævar Óli Hjörvarsson er oddviti Miðflokksins í Ísafjarðarbæ.

Ég heiti Sævar Óli Hjörvarsson, fæddur 1961 uppalinn í Reykjavík en ættaður af Hornströndum. Flutti til Ísafjarðar 17 ára. Ég er húsasmíðameistari að mennt og hef verið í ýmsum fyrirtækjarekstri undanfarin 30 ár og meðlimur í björgunarsveitinni Tindum í Hnífsdal í áratugi. Ég er giftur Halldóru Þórðardóttur og eigum við samanlagt 5 börn, 7 barnabörn og hundinn Týru. Ég hef gaman af ferðalögum, þá sérstaklega í Fljótavík, vera með fjölskyldunni og fleira.

Ég vil leggja áherslu á skólamál sveitarfélagsins og áframhaldandi uppbyggingu þar ásamt stuðningi við kennara. Gera þjónustu við bæjarbúa og fyrirtæki einfaldari og skilvirkari, tryggja framboð lóða fyrir íbúðir og fyrirtæki. Gera 10 ára áætlun um uppbyggingu íþróttamannvirkja í samráði við íþróttahreyfinguna.

Hvar á Íslandi myndir þú búa ef þú mættir ekki búa í þínu sveitarfélagi? 

„Austur á landi í góða veðrinu“

Hver er uppáhalds bókin þín? 

„Byssurnar í Navarone“

Ef þú þyrftir að skera niður í rekstri sveitarfélagsins þíns um hundrað milljónir, hvar myndir þú skera niður? 

„Hagræða í stjórnsýslunni, einfalda ferla og hámarka hagkvæmni í rekstrinum, meiri árangur fyrir hverja krónu til hagræðis fyrir bæjarbúa“

Ef þú fengir hundrað milljónir til að efla tiltekin verkefni eða svið í sveitarfélaginu, hver væru þau? 

„Uppbygging Íþróttamannvirkja og annara innviða svo sem gatna, bæta upplifun íbúa og gesta, styrking leikskóla bæjarins“

Hver væri titill ævisögu þinnar? 

„Allt er hægt að bæta“

Hvort er betra að hringja eða senda skilaboð? 

„Hringja, skilaboð ef allt um þrýtur“

Hvaða skoðun þín er óvinsæl innan eigin flokks? 

„Enginn hefur hingað til viðrað óænægju með skoðanir mínar“

Ef þú gætir orðið sérfræðingur í einhverju samstundis, hvað væri það? 

„Krabbameinslækningum“

Hvaða ákvörðun myndir þú taka á fyrsta ári í sveitarstjórn sem yrði umdeild? 

„Flest allar ákvarðanir eru umdeildar“

Hvað var það síðasta sem þú notaðir gervigreindina í? 

„Aldrei notað gervigreind bara eigin greind“

Hvaða flokki gætir þú hugsað þér að mynda meirihluta með? Hvaða flokki gætir þú alls ekki unnið með?

„Ég er opinn fyrir öllum flokkum, ágætis fólk í þeim öllum“

Nefndu mistök sem þú hefur gert á ævi þinni? 

„Að kenna hundinum á klukku“

Hvað er betra í þínu sveitarfélagi en öðrum? 

„Ísfirska lognið“

Hvað borðar þú í morgunmat? 

„Ávexti eða smoothie“

Hvað fer í taugarnar á þér varðandi stjórnun sveitarfélagsins í dag? 

„Ákvörðunarfælni og seinagangur“

Hvað finnst þér raunhæft að afreka á næstu fjórum árum? 

„Bygging nýrrar sundlaugar eða fjölnota íþróttahúss“

Hvert er uppáhalds lagið þitt? 

„Wild dances með Ruslönu, en ég dansaði einmitt fyrsta dansinn í brúðkaupinu mínu við það.“

Hvaða mistök hafa verið gerð í þínu sveitarfélagi undanfarin ár? 

„Lélegt viðhald húsnæðis í eigu bæjarins, ónógur þrýstingur á stjórnvöld vegna Súðavíkurgangna og annara samgangna við sveitarfélagið“

Hvert er uppáhalds gælunafnið sem þú hefur fengið og af hverju? 

„Hef ekki fengið gælunafn ennþá“

Hvaða loforð úr kosningabaráttunni munt þú standa við? 

„Öll sem ég get“