Loka­tölur í Ísa­fjarðar­bæ: Fram­sókn þre­faldar fylgi sitt

Á kjörskrá í Ísafjarðarbæ eru 2.976 manns. Níu fulltrúar eiga sæti í sveitarstjórninni. Greidd atkvæði voru 2090. 

Í sveitarstjórnarkosningunum 2022 náði Í-listinn hreinum meirihluta, en einn bæjarfulltrúi hans, Þorbjörn H. Jóhannesson, sagði skilið við meirihlutann árið 2025. Í-listinn var sameiginlegt framboð Samfylkingar, Vinstri grænna, Viðreisnar og óháðra.

Breytingar voru þá gerðar á nefndaskipan og embættum, þannig að Sjálfstæðismenn fengu embætti forseta bæjarstjórnar og Framsókn sömuleiðis embætti. Hafa flest mál verið afgreidd með miklum meirihluta bæjarstjórnar eftir að samstarfið sprakk, en Þorbjörn er nú á lista Miðflokksins. Í-listinn býður ekki fram í kosningunum nú þar sem ekki náðist samkomulag um áframhaldandi samstarf flokkanna sem að honum standa.

Arna Ýr Jónsdóttir gegndi embætti bæjarstjóra Ísafjarðarbæjar framan af kjörtímabili en tók svo sæti á þingi. Sigríður Júlía Brynleifsdóttir tók þá við stöðu bæjarstjóra. 

Í Ísafjarðarbæ er meðal annars að finna Ísafjörð, Hnífsdal, Flateyri, Suðureyri og Þingeyri.

Atkvæðin dreifðust þannig:

• B listi - Framsóknarflokkurinn og óháðir: 34,3% með 4 fulltrúa
• C listi - Viðreisn: 16% með 1 fulltrúa
• D listi - Sjálfstæðisflokkurinn: 25,6% með 2 fulltrúa
• M listi - Miðflokkurinn: 4,5% með 0 fulltrúa
• S listi - Samfylkingin: 19,6% með 2 fulltrúa

Eftirfarandi náðu kjöri:

• Kristján Þór Kristjánsson (B)
• Elísabet Samúelsdóttir (B)
• Stefán Hannibal Hafberg (B)
• Tinna Rún Snorradóttir (B)
• Jónas Þór Birgisson (D)
• Þóra Marý Arnórsdóttir (D)
• Svanfríður Guðrún Bergvinsdóttir (S)
• Helgi Karl Guðmundsson (S)
• Gylfi Ólafsson (C)