Villa valtaði yfir Forest og mætir Freiburg í úr­slita­leiknum

Aston Villa hvíldi sig vel um helgina en mætti með látum til leiks gegn Nottingham Forest. Fyrri leik liðanna laukm með 1-0 sigri Forest en strákarnir úr Skírisskógi máttu sín lítils í kvöld.

Ollie Watkins skoraði fyrsta markið á 36. mínútu eftir frábæran undirbúning hjá Emi Buendia, sem sólaði tvo varnarmenn áður en hann gaf góða stoðsendingu út í teiginn á Watkins.

Buendia skoraði svo annað markið sjálfur úr vítaspyrnu í upphafi seinni hálfleiks áður en fyrirliðinn John McGinn gjörsigraði Forest með tveimur mörkum á 77. og 80. mínútu.

Villa er þar með komið í úrslitaleik Evrópudeildarinnar, undir stjórn hins margreynda og mjög svo slungna Unai Emery. Liðið getur bundið á þrjátíu ára titlaþurrð þann 20. maí.

Freiburg er á leiðinni í sinn fyrsta Evrópuúrslitaleik eftir 3-1 sigur gegn Braga í kvöld. Fyrri leiknum lauk með 2-1 sigri Braga en viðsnúningurinn var glæsilegur í kvöld.

Leikurinn byrjaði illa fyrir Braga því á 6. mínútu var Mario Dorgeles rekinn af velli fyrir að brjóta af sér sem aftasti varnarmaður.

Braga hélt markinu hreinu í þrettán mínútur til viðbótar en svo braut Lukas Kubler ísinn og Johan Manzambi tvöfaldaði forystuna fyrir hálfleik.

Kubler skoraði svo annað mark og kom Freiburg 3-0 yfir áður en Pau Victor minnkaði muninn fyrir gestina undir lokin.