Fallhlífastökkvarar að­stoða með hantasmit á af­skekktri eyju

Breski maðurinn sem grunur er á um að hafi smitast af hantaveiru var farþegi á skemmtiferðaskipinu MV Hondius en fór frá borði um miðjan apríl og gekk á land á Tristan da Cunha sem er afskekktasta eyjan með íbúabyggð í breska konungsdæminu eftir því sem fram kemur í frétt Breska ríkisútvarpsins um málið. 

Maðurinn á heima á eyjunni en þar búa um 250 manns að staðaldri. Í frétt BBC má sjá hermenn stökkva út um bakhlið flugvélarinnar og hrapa í átt að eyjunni áður en þeir virkja flughlífar sínar. Súrefni var einnig komið til eyjunnar með fallhlífum þar sem súrefnisbirgðir voru af skornum skammti. Á eyjunni er enginn alþjóðaflugvöllur og getur það tekið langan tíma fyrir skip að komast þangað enda eyjan á ballarhafi. 

Þrír hafa látist vegna hantaveiru um borð skipsins Hondius sem er nú komið til Tenerife. Vinna stendur nú yfir að koma farþegum sem eru einkennalausir til sinna heimalanda.

Breski maðurinn á Tristan da Cunha fór frá borði fjórtánda apríl. 28. apríl fékk hann niðurgang og hita tveimur dögum síðar. Hann er nú í einangrun og ástand hans er stöðugt. Vanalega eru tveir heilbrigðisstarfsmenn á eyjunni. Bráðalæknir og hjúkrunarfræðingur eru meðal þeirra sem komu með hernum til eyjunnar ásamt þremur tonnum af lækningavörum.