Húsnæðis­vandinn er mannanna verk

Húsnæði er allt of dýrt, og það er mannanna verk. Undanfarna tvo áratugi hefur fólki fjölgað til muna á landinu, en á sama tíma hefur fjölskyldustærðin minnkað.

Dýrkeypt mistök Reykjavíkurborgar

Reykjavíkurborg var allt of sein að átta sig á þessum breytingum og byggði allt of lítið af húsnæði, einblíndi um of á þéttingu og byggði allt of mikið af stórum íbúðum. Vegna þessara mistaka hefur íbúðaverð tvöfaldast á 10 árum. Ef við svörum ekki uppsafnaðri íbúðaþörf og einblínum bara á dýra þéttingarreiti þá mun íbúðaverð halda áfram að hækka og stéttaskipting mun aukast, þar sem til verða stéttir eigenda og leigjenda.

5.000 íbúðir á leiðinni

Við í Flokki fólksins viljum snúa þessari þróun við, byggja meira og ná niður íbúðaverði svo ungt fólk eigi möguleika á að eignast íbúð. Við leggjum áherslu á byggingu nýrra hverfa í jaðri borgarinnar, eins og í Úlfarsárdal og Keldnalandi. Þegar Sundabraut kemur opnast ný tækifæri til uppbyggingar á Geldinganesi og Gunnunesi.

Við í Flokki fólksins höfum sýnt það í verki að við viljum byggja ný hverfi og styðja við fyrstu kaupendur. Það höfum við gert með því að koma af stað skipulagsvinnu fyrir stórfellda uppbyggingu í Höllum í Úlfarsárdal ásamt uppbyggingu á ríkislóðum í Reykjavíkurborg. Brátt munu rísa 5.000 íbúðir vegna þess að Flokkur fólksins stóð við gefin loforð.

Hlutdeildarlán og óhagnaðardrifið húsnæði til bjargar

Til að hjálpa næstu kynslóð að eignast íbúð höfum við gert miklar breytingar á hlutdeildarlánakerfinu. Nú geta fyrstu kaupendur fengið vaxta- og afborgunarlaust lán frá HMS, sem er svo gert upp við sölu íbúðarinnar og kallast hlutdeildarlán. Almenn hlutdeildarlán fara úr 20% í 25% af kaupverði. Fólk þarf því aðeins að safna 5% af kaupverði í útborgun, fær 25% hlutdeildarlán og 70% lán frá banka eða lífeyrissjóði. Hlutdeildarlán fyrir fólk undir lægri tekjumörkum hækkar úr 30% í allt að 35%. Þetta hefur í för með sér að greiðslubyrði fólks lækkar.

Til að hjálpa þeim sem eru að safna fyrir útborgun leggjum við áherslu á að efla uppbyggingu óhagnaðardrifins leiguhúsnæðis, en þar er leigan allt að 40% ódýrari en á almennum leigumarkaði.

Framtíðin ræðst á laugardaginn

Íbúðaverð tvöfaldaðist á síðustu 10 árum og ef við byggjum ekki ný hverfi þá mun það tvöfaldast á næstu tíu árum.

Flokkur fólksins vill brjóta land og byggja íbúðir. Setjum x við F, 16. maí.

Höfundur skipar 3. sæti á lista Flokk fólksins í Reykjavík.