Innlent

Icelandair aflýsir fimm brott­förum í dag

Sigurgeir Þorkelsson skrifar
Bogi Nils Bogason er forstjóri Icelandair.
Bogi Nils Bogason er forstjóri Icelandair. Vísir/Einar

Alls hefur fimm brottförum á vegum Icelandair frá Keflavíkurflugvelli verið aflýst í dag. Um er að ræða þrjá áfangastaði í Evrópu og tvo í Bandaríkjunum.

Ekki liggur fyrir hvers vegna flugferðunum var aflýst. Vísir hefur greint frá því að fella hefur þurft flugferðir niður á síðustu vikum vegna þess að ekki hefur tekist að fullmanna áhöfn. Þá hefur Icelandair einnig gripið til aðgerða til að bregðast við hækkandi eldsneytisverði og skorið niður flugáætlun sína á öðrum ársfjórðungi (apríl til júní) um tvö prósent.

Deilan við flugmenn og flugvirkja komin til sáttasemjara

Samningar flugmanna, flugvirkja og flugfreyja hafa verið lausir frá því í fyrra og eru deilur bæði flugmanna og flugvirkja komnar á borð Ríkissáttasemjara. Vísir hefur áður greint frá því að samkvæmt heimildum séu aflýsingar flugferðanna beintengdar kjaradeilu Félags íslenskra atvinnuflugmanna (FÍA) við Icelandair.

Ítarleg fréttaskýring um málið birtist á Vísi í gær:

Áfangastaðirnir sem um ræðir eru Frankfurt, Berlín, Stokkhólmur, Portland í Oregon-ríki og Newark, við New York-borg. Brottfarartímar dreifast jafnt yfir daginn. Vél til Frankfurt átti að halda af stað laust fyrir klukkan eitt í nótt, Berlín og Stokkhólmur kl. 7:35 í morgun, Portland kl. 10:00 og Newark kl. 17:00 síðdegis. 

Hefur áhrif á hundruð farþega

Búast má við að þetta hafi áhrif á ferðaáætlanir hjá hundruðum farþega en þotur Icelandair taka flestar um það bil 160 til 190 farþega.

Samkvæmt vef Isavia var flugum bæði til Stokkhólms og Færeyja aflýst í gær.

Ekki náðist í Guðna Sigurðsson, upplýsingafulltrúa Icelandair, við vinnslu fréttarinnar.

Veistu meira um málið? Þú getur sent okkur fréttaskot hér eða sent okkur línu á ritstjorn@visir.is. Fullum trúnaði er heitið.

Icelandair Flug Kjaramál Bensín og olía

Tengdar fréttir

Reynir á þolmörk flugmanna og svigrúm Icelandair

Kjaradeila Icelandair og flugmanna snýst nú um það hversu langt flugmenn eigi að ganga til að liðka fyrir rekstri félagsins. Þeir gáfu verulega eftir í endurreisn Icelandair árið 2020, en félagið sækist nú eftir auknu svigrúmi til að bregðast við taprekstri, harðnandi samkeppni og breyttu flugrekstrarumhverfi. Fundur deiluaðila hjá ríkissáttasemjara í dag snerist meðal annars um flugtíma, hvíld, vaktir og frí; veigamikil atriði í deilunni sem ráða miklu um bæði vinnuskilyrði flugmanna og framleiðni Icelandair.

Gátu enn og aftur ekki mannað flug í tæka tíð

Ekki tókst í tæka tíð að manna flug Icelandair til Rómar í fyrramálið og hefur því verið frestað um hið minnsta einn og hálfan tíma. Icelandair hefur í síðustu vikum átt í vandræðum við að manna flugvélar.

Mest lesið


Fleiri fréttir

Sjá meira


×

Mest lesið