Einum sigri frá því að fara í úr­slit í fyrsta sinn á öldinni

Knicks unnu þrettán stiga sigur á heimavelli Cleveland í gærkvöld, 121-108, og geta þar með klárað einvígið á mánudagskvöld með sigri, þegar aftur verður leikið í Rocket Arena.

Hafa ber í huga að engu liði hefur tekist að vinna upp 3-0 forskot í seríu í úrslitakeppni NBA og því yfirgnæfandi líkur á að Knicks vinni og komist í úrslit NBA-deildarinnar í fyrsta sinn á þessari öld, eða frá árinu 1999. Heimamenn virtust hreinlega gefast upp í gær.

Knicks lentu aldrei undir í leiknum í gær og hafa nú unnið tíu leiki í röð í úrslitakeppninni sem er met í sögu félagsins. Meðalstigamunur í þessum leikjum er 22,5 stig.

Jalen Brunson skoraði 30 stig í gærkvöld og varð stigahæstur en Mikal Bridges skoraði 22. Karl-Anthony Towns skoraði 13 stig, tók átta fráköst og gaf sjö stoðsendingar.

Hjá Cleveland var Evan Mobley stigahæstur með 24 stig, Donovan Mitchell skoraði 23 og James Harden 19.

Sigurliðið í einvíginu mætir annað hvort San Antonio Spurs eða Oklahoma City Thunder og hefst úrslitaeinvígið 4. júní. Thunder er 2-1 yfir gegn Spurs en liðin mætast í San Antonio í kvöld.