United bætti sig mest en Liverpool hrakaði

Keppni í ensku úrvalsdeildinni kláraðist með lokaumferð deildarinnar í gær. West Ham féll niður um deild og Liverpool náði síðasta Meistaradeildarsætinu sem í boði var. Nýliðar Sunderland náðu óvænt sæti í Evrópudeildinni á kostnað Chelsea.

Bournemouth fylgir Sunderland í Evrópudeild og Brighton keppir í Sambandsdeild Evrópu.

Manchester United lauk tímabilinu með 3-0 sigri á Brighton og var það tilkynnt fyrir helgina að Michael Carrick hafi verið ráðinn sem stjóri félagsins eftir að hafa tekið tímabundið við í upphafi árs eftir brottrekstur Rúbens Amorim.

United hefur leikið frábærlega undir stjórn Carricks og skotist upp töfluna. Liðið hafnaði í þriðja sæti með 71 stig, sem er 29 stigum fleira en liðið fékk í deildinni á síðustu leiktíð.

United bætti sig lang mest hvaða stigasöfnun varðar milli leiktíða. Næst þar á eftir eru Englandsmeistarar Arsenal sem fengu ellefu stigum meira en árið áður.

Fráfarandi meisturum Liverpool hrakaði mest á milli ára og var titilvörnin einkar slök. Liverpool fékk 24 stigum minna en á síðustu leiktíð og endaði í fimmta sæti með 60 stig.

Wolves er næst á eftir og féll sem botnlið deildarinnar, með 22 stigum minna en í fyrra og Nottingham Forest fékk 21 stigi minna en á síðustu leiktíð.