Rauður dagur í Kaup­höllinni

Óvissa hefur verið þema í umfjöllun Vísis um efnahagsmál síðustu daga. Nú síðast í morgun lýsti fjármálastöðugleikanefnd Seðlabankans yfir viðvarandi óvissu í alþjóðlegum efnahagsmálum, versnandi verðbólguhorfum og að háir vextir muni reyna á viðnámsþrótt fjármálakerfisins á komandi misserum. Þá fari húsnæðisverð lækkandi að raunvirði á sama tíma og íbúðum á sölu haldi áfram að fjölga.

Það er íslenska lyftæknifyrirtækið Oculis sem hefur leitt lækkanir á markaðnum síðustu daga. Slæmar fréttir bárust af lyfjaþróun fyrirtækisins í lok síðustu viku sem leiddu til hruns í markaðsvirði félagsins. Félagið hafði við lokun Kauphallarinnar lækkað um 57%.

Viðskiptablaðið greinir þó frá því að gengi félagsins hafi hækkað við opnun markaða vestanhafs, en félagið er einnig skráð í Bandaríkjunum.

Meðal fyrirtækja sem lækkuðu mest í dag eru fjarskiptafyrirtækin Nova Klúbburinn, um 2,23%, og Sýn, um 2,8%. Þá lækkað Icelandair um 2,62% en félagið stígur þessa dagana krappan dans þar sem olíuverð fer hækkandi og niðurfellingar brottfara tíðar vegna vélaskorts og flugmannaskorts.

Mest viðskipti voru með bréf Íslandsbanka í dag upp á alls þrjú hundruð og sextíu milljónir.

Úrvalsvísitala Kauphallarinnar sem stóð í 2800 stigum fyrir viku síðan hefur lækkað um tæp tíu prósent í vendingum síðustu daga, niður í 2562 stig.

Vísir er í eigu Sýnar hf.