Stjarnan mætir Víkingi í undan­keppni Sambandsdeildar

Stjarnan öðlaðist þátttökurétt í undankeppninni með því að enda í þriðja sæti Bestu deildarinnar á síðasta tímabili. 

Valur verður einnig í undankeppni Sambandsdeildarinnar en fer beint í 2. umferðina og fær ekki að vita sinn andstæðing fyrr en á morgun.

Víkingur Götu varð í 4. sæti færeysku deildarinnar á síðasta ári og er í 4. sætinu sem stendur. Liðið hefur tekið þátt í undankeppnum Meistara-, Evrópu- og Sambandsdeildarinnar á síðustu árum en aldrei náð alla leið, líkt og Stjarnan.

Fyrri leikur Stjörnunnar og Víkings fer fram í Færeyjum þann 9. júlí. Seinni leikur liðanna fer fram í Garðabænum viku síðar, 16. júlí.

Liðin sem Stjarnan gat fengið upp úr pottinum voru eftirfarandi:

• St Joseph's FC (Gíbraltar)
• Levadia Tallinn (Eistland)
• Differdange (Lúxemborg)
• Víkingur (Færeyjar)
• RFS (Lettland)