Ein stærsta drónaárásin á Rúss­land frá upp­hafi stríðsins

Mikill eldur sást geisa í Olíuhreinsistöð Moskvu, um fimmtán kílómetrum frá Kreml, á myndböndum og myndum sem rússneskir fjölmiðlar birtu í morgun. Þykkan svartan reykjarmökk lagði yfir borgina.

AP-fréttastofan segir að hreinsistöðin sé ein sú stærsta í Rússlandi og að hún meðhöndli um þriðjung eldsneytis fyrir höfuðborgarsvæðið. Hún varð einnig fyrir úkraínskri drónaárás á þriðjudag.

Flugferðum til og frá fjórum flugvöllum við Moskvu var frestað vegna árásanna.

Volodýmýr Selenskí, forseti Úkraínu, lýsti árásunum sem „langdrægum refsiaðgerðum“ gegn Rússlandi í færslu á samfélagsmiðlum í morgun. Hann segir Úkraínumenn einnig hafa hæft skotmörk í Rostov og á hernumdum svæðum í Úkraínu.

Árásin hófst nokkrum klukkustundum eftir að Selenskí greindi frá mikilvægu samtali við Donald Trump Bandaríkjaforseta og Emmanuel Macron Frakklandsforseta sem gæti haft „verulegar breytingar í för með sér“.

Áður hafði Selenskí sagt að hann hefði tryggt Úkraínu áframhaldandi stuðning á G7-ráðstefnunni í Frakklandi, þar á meðal frá Bandaríkjastjórn.

Brak lenti á íbúðarhúsnæði

Auk olíuhreinsistöðvarinnar varð íbúðarblokk í bænum Zhukovskí í Moskvuhéraði fyrir úkraínskum dróna og var hún rýmd.

Brak úr drónum sem rússneskar loftvarnarbyssur skutu niður lenti einnig á íbúðarhúsum, iðnaðarhúsnæði og fleiru. Andrei Vorobjov, héraðsstjóri í Moskvuhéraði, segir að kona hafi særst af þessum sökum.

Rússneska varnarmálaráðuneytið segist hafa skotið niður 555 úkraínskra dróna víðsvegar yfir Rússlandi, þar á meðal um tvö hundruð þegar þeir nálguðust Moskvu.

Úkraínumenn hafa ítrekað beint spjótum sínum að olíuinnviðum í Rússlandi til þess að reyna að draga úr getur Rússa til þess að há stríð sitt í Úkraínu og láta Rússa finna fyrir afleiðingum þess.