Sinner og Djokovic þurfa að draga sig úr keppni

Ítalski tenniskappinn Jannik Sinner varði Wimbledon-titilinn fyrr í mánuðinum en hefur dregið sig úr keppni á opna kanadíska mótinu sem á að fara fram í byrjun ágúst. Einnig hefur Novak Djokovic dregið sig úr keppni en hann tapaði fyrir Sinner í undanúrslitum Wimbledon-mótsins.

Carlos Alcaraz er búinn að vera fjarverandi á mótum undanfarið en hann er að jafna sig á meiðslum í úlnlið. Hann hefur verið frá keppni síðan í apríl.

Opna kanadíska mótið er hluti af Masters 1000 mótaröðinni sem eru stærstu mót tennisheimsins fyrir utan risamótin fjögur. Skipuleggjandi Opna kanadíska mótsins sýnir því skilning að leikmenn dragi sig úr keppni til að forgangsraða heilsunni sinni en er svekktur yfir því að bestu tennisspilarar heims séu ekki að keppa á mótinu.

Skipulag tennismótanna er of þétt að mati skipuleggjanda mótsins og vonar hann að tímasetningum verði breytt svo leikmenn geti keppt á sem flestum mótum. Masters 1000 mótin eiga að vera heimavöllur bestu tennisspilara heims og það er vont fyrir íþróttina að þeir geti ekki keppt á þessum mótum.

Leikmenn hafa kvartað yfir miklu álagi á tímabilinu og ef leikmaður keppir á öllum stærstu mótum tímabilsins er hann að keppa ellefu mánuði á ári.