Sneru leiknum á síðustu stundu og komust á­fram

Útlitið var svart fyrir Ísland þegar fjórði leikhluti hófst. Aserbaísjan hafði leitt allan leikinn en á lokamínútunum náðu stelpurnar okkar að snúa leiknum sér í vil.

Þórey Tea Þorleifsdóttir, leikmaður Grindavíkur, var stigahæst hjá Íslandi í dag með 14 stig auk 6 stoðsendinga. KR-ingurinn Rebekka Rut Steingrímsdóttir fylgdi henni fast eftir með 13 stig.

Með sigrinum tryggði Ísland sér að minnsta kosti annað sætið í sínum riðli og áframhald í átta liða úrslit. Ísland tapaði aðeins einum leik í riðlakeppninni, gegn Rúmeníu sem gæti tryggt sér toppsætið og fullt hús stiga síðar í dag.

Liðin sem enda í efstu þremur sætum mótsins fá svo sæti í A-deild á næsta ári.