Thelma komst inn og fjögur fara fyrir Ís­lands hönd á HM

Thelma tók þátt í heimsbikarmótaröðinni fyrr á árinu og var góður árangur hennar í Kaíró í Egyptalandi lykilatriði í að tryggja henni sætið á HM. Þar keppti hún til úrslita á gólfi og var aðeins hársbreidd frá verðlaunapalli en skoraði nógu vel til að komast á HM sem fer fram í Rotterdam í október.

Þetta er í fyrsta sinn sem Ísland tryggir sér sæti á heimsmeistaramóti með þessum hætti og undirstrikar mikilvægi þátttöku á heimsbikarmótaröðinni að sögn Fimleikasambandsins.

Thelma getur því fagnað gleðitíðindum eftir erfitt gengi á EM í síðustu viku þar sem hún keppti skömmu eftir puttabrot. Fimleikasambandið var hrætt um að HM draumurinn væri úti en svo var alls ekki.

Einnig hefur verið staðfest að Lilja Katrín Gunnarsdóttir, Ágúst Ingi Davíðsson og Dagur Kári Ólafsson hafi tryggt sér þátttökurétt á HM eftir frábært gengi á Evrópumótinu í síðustu viku.

Gott gengi þeirra þriggja á Evrópumótinu í síðustu viku tryggði sætið á HM. Aðeins 23 einstaklingar úr karlaflokki geta unnið sig inn á HM í gegnum þessa leið og því ljóst að Ágúst Ingi og Dagur Kári eru að stimpla inn í hóp þeirra bestu.

Martin Bjarni Guðmundsson náði einnig lágmarki inn á HM en aðeins er pláss fyrir tvo keppendur frá hverju landi í einstaklingskeppninni.