Gamli Primark-starfsmaðurinn sem var ná­lægt því að skemma fyrir Mourinho

Espanyol festi kaup á Álex Calatrava, eða Cala eins og hann er jafnan nefndur, fyrir um fimm milljónir evra í sumar. Kantmaðurinn þreytti frumraun sína í spænsku úrvalsdeildinni í gær og skoraði í naumu tapi fyrir Real Madrid, 1-2.

Þetta var fyrsti keppnisleikur Real Madrid undir stjórn Josés Mourinho síðan hann sneri aftur til félagsins, þrettán árum eftir að hafa verið hjá því síðast.

Cala er Katalóni og var tvö ár í La Masia, hinni margrómuðu unglingaakademíu Barcelona.

Hann náði ekki í gegn þar en gekk seinna í raðir Horta. Þar spilaði hann sinn fyrsta leik með aðalliði félagsins þegar hann var aðeins sautján ára.

Cala fór svo til Sant Andreu og spilaði þar með yngri liðum félagsins. Síðan tók við flakk um neðri deildirnar á Spáni.

Meðan Cala lék með Parets í sjöundu efstu deild vann hann í Primark og lagði stund á verkfræðinám.

Cala var ekki með bílpróf á þessum tíma og faðir hans þurfti að keyra hann eldsnemma að morgni í vinnuna. Eftir vinnudaginn fór hann í skólann og þaðan á æfingu með Parets.

Frammistaða Cala með Parets vakti athygli D-deildarliðs Sants og hann samdi við það 2020. Þaðan fór hann til C-deildarliðs Costa Brava og síðan í varalið Atlético Madrid.

Eftir tvö ár þar nældi Castellón, nýliðar í B-deildinni, í Cala og þar fór ferillinn á mikið flug. Á síðasta tímabili skoraði Cala fimmtán mörk í B-deildinni.

Castellón komst í umspil um sæti í spænsku úrvalsdeildinni en tapaði fyrir Almería, 4-3 samanlagt.

Cala tók hins vegar stökkið upp í úrvalsdeildina því Espanyol keypti hann í sumar. Félagið hafði einnig augastað á honum í fyrra en lét vaða í sumar og Cala er strax byrjaður að borga til baka.

Espanyol er með þrjú stig eftir fyrstu tvo leiki sína í spænsku úrvalsdeildinni. Næsti leikur liðsins er gegn Orra Steini Óskarssyni og félögum í Real Sociedad á útivelli næsta laugardag.