Skutu flug­eldum að á­horf­endum

Feyenoord vann leikinn 5-2 en gera þurfti tíu mínútna hlé í fyrri hálfleik þegar hópur stuðningsmanna liðsins kveikti í flugeldum og blysum, en leikið var á heimavelli Cambuur.

Samkvæmt frétt BBC var flugeldum beint að stuðningsmönnum Cambuur og segir félagið í yfirlýsingu að sumir þeirra hafi brennst og hlotið augn- og heyrnarskaða.

Giovanni van Bronckhorst, fyrrverandi aðstoðarmaður Arne Slot hjá Liverpool og nú þjálfari Feyenoord, hefur beðið Cambuur-menn afsökunar.

„Það ætti að vera alveg á tæru að það er algjörlega óafsakanlegt að kveikja í flugeldum á fótboltaleikvöngum,“ segir í yfirlýsingu Cambuur sem vann sig upp í hollensku úrvalsdeildina í vor.

Forráðamenn Feyenoord hafa heitið að funda með forráðamönnum annarra félaga og hollenska knattspyrnusambandinu, í von um að finna lausn á vandamálinu en þetta er síður en svo í fyrsta sinn sem flugeldar og blys valda vandræðum á fótboltaleikjum í landinu.